رانيا عبدالغفار

( يخرج هاني من الجامع في حاله من الذهول و عينيه ممتلئة بدموع لا تنسال من عينيه كأنها ملتصقة و عنيدة، فهو لا يصدق، و يسمع حازم و هو يقول : " الحياة هي الستات و الستات هن الحياة، يا سلام حلوة الحياة"

ويتذكر منظر التابوت و المصلين و تسقط دمعة و يسمع صوت حازم مرة أخرى : " هو ده المقياس الحقيقي للرجولة طبعا ً !"

و يسمع صوت أخو حازم و هو يبكي في الجامع و يدعوله بالمغفرة و الرحمة و يتذكر منظر أهله و هو يسلم عليهم واحد واحد و هم يبكون بعض بكاءهم على فقدانه و أغلبه لخوفهم عليه لما كانوا يعرفونه عن طبيعة حياته و ملذاته،

ثم يتذكر مره أخرى حازم : " مقياس الرجولة "

و فجأه ينطق هاني : آه يا " غبي " ! يا غبي !! يا حازم،،، يا حازم !

هاني: حاجه صعبة أوي لما تحس مره واحدة إنك وحيد مع أن لك أسرة و زوجة ... كنت محتاج في اللحظه دي، دي بالذات ، إنها تبقى جنبي!

الدكتور : مين فيهم ؟ (ينظر حازم فجأه للدكتور كأنه مصدوم لعدم معرفته جواب لهذا السؤال و قبل أن يفكر يسأله الدكتور)

الدكتور : طب حاولت تكلم مراتك ؟

هاني: طبعا ً كلمتها ؟

الدكتور : و ؟

هاني: ما ردتش على الموبايل ؟

-----------------------------------

ندى: يااه! يا ما كلمته و ما ردش، ياما، إش عرفه؟ مش يمكن - و حقيقي- كنت في مواقف كده محتاجه اللي يحضني و يحسسني بالدفا، و إني مش لوحدي ؟ إزاي أبقى حاسة بالبرد و أنا عندي زوج، أنا مش قادرة أفهم ؟

الدكتور : و علشان كده لجأتي للدفا من حد تاني ؟

ندى : ما تقولش كده!

الدكتور : بس هو كده ، حتى و إن كان على الإنترنت و حتى إن كان جوزك، فهو في حالتك برده حد تاني!

_________________________________________

هاني : يمكن ، يمكن احتياجي للدفا هو ده إللي حللي أو يمكن سهللي إني أكتبلها تاني، خصوصا ً إنها كانت حاجة برده بتربطني لسه بحازم الله يرحمه ، زي ما يكون سبهالي أمانة، مره واحدة حسيت إني لازم أرجع بسرعة أكتبلها، حسيت..

الدكتور : إنك محتجلها ؟

( يصمت هاني، ثم يهز رأسه بالايجاب )

(تضغط ندى على زرار الإرسال و تبعث بالرساله لهذا الرجل الذي إتضح أنه رجل و يا للمقلب الكبير !!

تنظر إلى الشاشة و كأنها تودع حلما ً عزيزا ً عليها ، كأنها تفارق دفا و عطف و تقدير و حضن و صديقة،،، لكنه صديق، و لكنها لم تعلم ،،

وإن كان هناك رجل بكل هذه المشاعر فلماذا هو ليس زوجها ؟ و لم زوجها ليس هو؟؟ لماذا ؟

تنظر نظرة أخيرة ثم توقظ نفسها و تتذكرأعمال البيت التي تنتظرها ، يلفت نظرها ضوء موبايلها المنير و ترى مكتوبا ً على شاشته مكالمة لم يُرد عليها

و تقول لنفسها : إمتى ضرب الموبايل؟ معقول ضرب و ما سمعتموش ؟ ما أنا برده ما كنتش في حالة طبيعية.

( ثم تنظر في موبايلها لتعرف من الذي طلبها فتجده زوجها)

ندى: ياه و إيه إللي فكره بيّا ؟ يا ترى إيه يا هاني ؟

( و تستعد لتطلبه ثم تتوقف )

ندى: لأ معلش، مرة بأه، مرة ما عَبَّركش زي ما إنت يا ما، يا ما عبرتنيش ، واحدة قصاد ميّه مش ظلم ، و لا إيه ؟!!

(يقود هاني سيارته و هو يفكر : لازم أكلمها، لازم أكتبلها و أقولها إن حازم مات، مات و سابها أمانة في رقبتي، لازم تعرف إنه ما كانش وحش أوي زي ما كان الناس كلهم فاكرين، علشان كده هو إدهالي، أكيد هي حتفهم أكيد !

(يدخل مكتبه و يجلس على المكتب و ينظر إلى شاشة الكمبيوتر فيجد أنه هناك رسالة جديدة )

هاني : أنا كنت عارف إنها أكيد حتحس بيّا، كنت عارف!

ثم يفتح الرسالة و يقرأ :" أنا آسفة، عندما بدأت في الكتابة كنت أعتقد أنك أمراءة مثلي

(يتوقف،)

هاني: امرأة؟ يعني إيه؟ ....هو ده الدور اللى كنت عامله يا حازم؟ عامل نفسك واحدة ست؟ علشان كده هي كانت بتراسلك... أنا برده قلت إزاي ؟ إزاي واحدة زي دي تعرف واحد زيك...

( و يعود ليقرأ مرة أخرى:)

" آسفة!"

(يتوقف مرة أخرى، لا يريد أن يكمل، فهو خائف مما سيأتي،،، ثم يكمل قراءة )

" أما الآن و قد اتضح لي أني كنت أراسل و أتحدث مع رجل آخر غير زوجي، فإني، فإني أشعر بشدة الحرج و الخجل ، الحرج منك و الخجل من نفسي و من ربي،،! و مما كنت تكتبه لي و خاصة في رسالتك الأخيرة لي، فأنا أعلم جيدا ً أنك سوف تتفهم شعوري و قراري بعدم إكمال هذه العلاقة "

( و يتوقف عن القراءة و يغمض عيناه و يهز رأسه بالنفي

هاني: لأ حرام عليكي ما تسبنيش إنتي كمان! ما تسبنيش لوحدي ، دانا محتاجك أوي دلوقتي، دلوقتي بالذات، طب دلوقتي بس و بعدين لأ! دلوقتي بس

( ثم لا يكمل الرسالة و ينظر بجانب الشاشة فيجد إسم المرسلة ن.ه. من ضمن الموجودين على الإنترنت الآن فيضغط على إسمها و يطلب المحادثة في الشات و لكنها لا ترد )

هاني : أرجوكي! أرجوكي ردي!

( و يضغط مرة أخرى و لا يجد ردا ً ،ينظر إلى الشاشة و هو لا يعرف ماذا يفعل ثم تنحدر دمعة من عينيه و يقرر أن يكتب، أن يكتب حتى و إن لم ترد عليه، سو ف يكتب و يتخيل أنها تقرأ كلامه و تشعر به و تواسيه ،حتى و إن لم ترد بالكلام سوف يشعر أنها ترد عليه بأحاسيسها الرقيقة الدافئة ،نفس المشاعر الجميلة المخلصة التي منعتها من إكمال العلاقة، فقد جعلته يقدرها أكثر و يريد معرفتها أكثر ، و لكنه هو الآخر شخص غير سئ و يخاف ربه و لا يريد فعل ما يغضب الله أو يؤنب ضميره، و لكن الآن في هذه اللحظة ألا يمكن التساهل قليلا ً؟ الآن فقط، و لو للحظة يشعر فيها بالدفء ثم تبعد بعد ذلك بلا رجعة ؟)

هاني : دلوقتي بس أرجوكي !

( ثم يبدأ في الكتابة : " مات صديقي ، مات و تركني ، و تركني و ترككي،! مات...

( ثم يتوقف عن الكتابة فهو لا يعلم ماذا يكتب بعد ذلك فيتوقف و ينظر إلى الشاشة لا يعلم ماذا يفعل .)

(تقف ندى في المطبخ تعد الطعام ، و هي طوال الوقت تفكر في كل ما حدث لها الأسبوع الماضي، من يوم أن رأت السايت على الأنترنت إلى أن أكتشفت أن من تراسله رجل و يا للخسارة ، يا للخسارتين )

ندى : يا ترى لما قرا رسالتي زعل؟ أكيد حد بالأحساسيس و الأخلاق دي أكيد حيُحرج و حيزعل إنه حطني في موقف محرج كده، بس يا ترى كان فاكرني إيه لما كنت براسله؟ كان فاكرني ست ممكن تعرف راجل تاني و تراسله و تفضفضله ؟ يا خبر ده أكيد كان منظري وحش أوي ، بس دي غلطته . ليه ما قالش إنه راجل من الأول ؟ طب و أنا ليه ما حطتش إحتمال إنه راجل؟

36 الدكتور : و حقيقي ليه ما حطتيش أبدا ً إحتمال إنه راجل ؟

ندى : ما كنتش عايزاه يبقى راجل ، كنت محتاجة إنه ما يبقاش راجل، كنت محتاجة أتكلم و أتكلم و أحكي ، كنت محتاجة أعيط لحد، كنت محتاجة حاجات كتير...

الدكتور : بس إنتي متجوزة يعني عندك حد يعملك كل ده

ندى : ( تضحك ) أنا علشان متجوزة ما بقاش ليّا الحق يبقى عندي كل ده ! الرجالة مش فاضيين لهيافتنا و حساسيتنا و الحبتين اللي بنعملهملهم كل شوية علشان نحسسهم إنهم مقصرين في حقنا، ولو قلنا لحد بره يبقى خرجنا أسرار البيت، و نبقى مش أمينات على أزواجنا و على بيوتنا.

الدكتور : بس لو الجواز كئيب أوي كده للستات ، بيتجوزوا ليه ؟ و بيقعدوا في الجواز ليه؟ أكيد الجواز فيه حاجة حلوة و لا إيه ؟

ندى: إيه رأيك في السبناخ ؟

الدكتور : أفندم ؟

ندى : بأسألك إيه رأيك في السبانخ ؟

الدكتور : و إيه علاقة ... ؟

ندى : ما أنت لو رديت عليّا حأقولك

الدكتور : يعني هي مفيدة

ندى : بيعجبك طعمها ؟

الدكتور: مالهاش طعم بس-

ندى : بس مفيدة، مش كده؟ و مليانة حديد إحنا محتاجينه ،، طب و الجاتوه ؟

الدكتور : أرجوكي يا مدام ندى خليكي -

ندى : الجواز يا دكتور ....

---------------

هاني : زي الأكل تمام ، لازم تاكل علشان تعيش بس المشكلة إن الستات بعد الجواز زي السبانخ مفيدين و هما دول إللي حيخلوك تقدر تعيش بصحة، بس...

-------------

ندى : بس سبانخ! لكن رجالة بره ، زي مثلا ً رجالة فرنسا ، لبنان ، بكلامهم الحلو و دلعهم لمراتتهم و كل الستات التانية برده اللي مش مراتتهم، زي الجاتوه ، مش صحي، و يمكن يأذي، بس القطمة منها ممكن تقعدك أسبوع بحالة بتفكر فيها و بإحساس الأنوثة اللي الست حست بيه من الكلمتين الحلوين اللي سمعتهم ، الكلمتين دول في الهوا زي كده السعرات الحرارية الفاضية زي ما بيقولوا ، بس كل ما حتجوع أو تبرد حتفتكر طعم الكلمتين دول، و الإحساس الجميل إللي حسيت بيه ، و تحلم .. جعان و بردان بس في قلبك حلم جميل!

---------------

هاني : علشان كده بنتجوز سبانخ ، و نحلم بالجاتوه!

الدكتور : طب ما حدش جرب ياخد طبق سبانخ بالجاتوه ؟

---------

ندى : ما يركبوش يا دكتور !

الدكتور : لا ، يعني قصدي ( ويقول و هو يحلم) صينية،، فيها طبق سبانخ على شوية رز على حتتين لحمة و عصير، و جنبهم حتة بطيخة على حتة مانجة، على حتة جاتوه ؟

---------

( تضحك ندى )

ندى: ما هو يا دكتور، الستات كلهم و اللهي، بيدخلوا عش الزوجية شايلين الصينية إياها ، بس هي أول خناقة على شوية وشوش عكرة راجعلنا من الشغل، و نلاقيهم رموا الجاتوه في الزبالة و الباقي من الشباك و يروحوا مديينها سبانخ،، لغاية ما مايفضلش أي أكلات تانيه، فإحنا كمان بنرمي الجاتوه !

-----------

هاني : و الباقي من الشباك و يدوها سبانخ ،،مع إن الأوردر اللي بنعمله قبل الجواز بيبقى وجبة كاملة متكاملة ، بس هو إحنا حنقعد نتكلم في الأكل كده يا دكتور ؟

الدكتور : لا أبدا ً؟ كنت عايز أعرف بس رأيك في السبانخ ، مش أكثر !!!!

( تنشف ندى يدها وتخرج من المطبخ متجهة إلى المكتب حيث يوجد الكمبيوتر )

ندى : يا ترى قريت؟

( ثم تنظر إلى الشاشة فتجد أنه قد دخل إلى التشات، فتسحب كرسي من تحت المكتب و تجلس و تفتح ما قد بعثه لها و تقرأ : "مات صديقي "!

تنظر ندى إلى الرسالة و كأنها لا تفهم معنى الكلمات المكتوبة، لا تعلم ما هذه الرسالة الغريبة، هي تفهم من الكلام أن صديقه مات، و لكن لماذا كتب لها عنه ؟ و ماذا يعني بأنه تركه و تركها؟ ما هذا الكلام الغريب؟

ثم تقرأ مرة أخرى ، إنها جملة واحدة فقط، و مع ذلك فهي متقطعة كأنه في حالة نفسية متعبة ، بل أغلب الظن أنه هو الآخر لا يعلم ماذا يكتب ، و تقطع كلماته كأنه بكاء لا صوت له، تماما ً كما كانت تبكي من قبل دموعاً لا صوت لها .

فجأة شعرت بحزنه داخلها كأنه حزن شديد ثقيل ، كأنها ، و هي هنا و هو هناك، في لحظة حزن و صمت ، شعرت به يمد يده طالبا ً النجدة ، مثلما فعلت هي من قبل، يحتاج لمن يشعر به و ينصت إلى أنينه، مثلها من قبل ، و لكن ماذا تفعل؟

لقد أنهت كلامهما و علاقتهما، لا لم تكن علاقة ! هي لم تكن تعلم الحقيقة و لم تكن لتفعل هذا الخطأ ،، هذه الخطيئة ! إنها متزوجة! و هو الآخر، هو اللآخر متزوج، لماذا لم يستنجد بزوجته؟ لماذا لم تستنجد هي بزوجها؟

هي تعلم ردها على سؤالها الأخير و بالتالي قد يكون هو نفس الرد على سؤالها الأول، نعم ، هو أيضا ً زوجته ليست معه ، معه بلحمها و دمها ، ولكن ليس بشعورها و قلبها، قد يكون قد طلبها في وقت صدمته و لم ترد عليه، تما ماً مثل زو جها الموجود الذي لا يسأل و لا يرد ، و لكنها كانت تعتقد أن هذا أسلوب الرجال ، و الآن إتضح لها غير ذلك عندما وجدت هذا الرجل الرقيق و زوجته ال... ماذا؟ هي لا تعرفها ،، بل تعرفها ،، هي نسخة مؤنثة من زوجها هاني ، نعم ، تعرفها نعم المعرفة !

و لكن ماذا تفعل حتى و إن كان هاني سئ و زوجة هذا الرجل أسوأ ؟ لا يمكن قيام أية علاقة أو صلة بينها و بين هذا الرجل، لا يمكن! لا يمكن! ماذا تفعل ؟

ثم تنظر مرة أخرى إلى الشاشة و تقرأ " مات صديقي و تركني"

ندى : لأ ما ينفعش، حرام عليّا أسيبه كده!

( ثم تتذكر )

ندى: بس حرام برده أرد عليه، بس ده مسكين، و ضعيف أوي في اللحظة دي، و لو سبته ما عرفش ممكن يلجأ ، يعني ممكن يلجأ لحاجات غلط ، حاجات حرام ، خصوصا ً إن مراته المغفلة دي مش راضية تنجده! بس ما أنا كمان أنجده بصفتي إيه ؟ طب أنا ممكن أكتبله نصيحة، حاجة بس تثبته !

( ثم تنظر للشاشة كـأنها تكلمه )

ندى: مش عارفة أعمل فيك إيه،، حيرتني،، أكلمك حرام، ما كلمكش حاسّة إنه برده حرام ! هو الرجالة كلها بتغَلِب كده ليه؟ لأ بس ده حاجة تانية، ده أمير و مؤدب و بيعرف ربنا! طب ، طب على الأقل أعزيه ، آه أعزيه، زي أي حد ماشي في الشارع و لقى صوان يدخل يعزي! أيوه ،خلاص !

( و تنظر إلى الشاشة و تضغط على زرار الرد و تكتب " السلام عليكم" ، ثم تتوقف و تضع إصبعها في فمها من الحيرة )

ندى : لأ، هو السلام حلو، بس إحنا مش حندردش مع بعض..

( ثم تمسح الكلام و تكتب " أردت أن.... "

ندى : لأ ( و تمسح مرة أخرى )

ندى: هي " البقاء لله " و بس حضرِتَك.

( تكتبها و تنظر إلى الشاشة )

ندى: يا حرام! طب و ياترى دي حتفيدك في إيه؟ بس أعملك إيه؟ ما أقدرش أكثر من كده ، أنا أسفة!

( و تضغط على زر الإرسال )

(يتنبه هاني للرد الذي وصل، أهي حقا ً ؟ أردت عليه حقا ً أم أنه يحلم ؟

يقرأ مرة أخرى " البقاء لله "، نعم لقد ردت عليه، لقد أحست به، و لكنه لن يعرفها بعد اليوم فهذا خطأ، بل حرام، و لكن يجب أن يردعليها ، نعم يعرف كم هي محترمة و لا تقدر على فعل ما يؤنب ضميرها الحي الجميل الرقيق، فهي مثل الملاك بل هي ملاك

( و يتخيلها و يبتسم ) و إن لم يرد عليها سيحرجها أكثر و أكثر! و إن لم يكن سيرد عليها، فلماذا بعث لها في بادئ الأمر؟ لا، سيرد عليها، فيكتب " شكرا ً "

هاني : بس كده؟ بأه الست تعمل كل ده و اقولها بس " شكرا ً " ؟ طب و حأقول إيه؟ ما هو ما فيش حاجة أقولها...

( و يضغط على زر الإرسال )

----------------

(تظهر على شاشة ندى جملة تفيد بأن الطرف الآخر يقوم بالرد على رسالتها فتشعر بالقلق،

و فجأة تظهر " شكرا ً "، و تصدم ندى، كأنها أصابتها شحنة كهربائية ،

إنَّ هذا كأنهم يتكلمون سوياً! بل و كأنه أول مرة ! لقد تراسلوا و تكلموا كثيرا ً من قبل على الإنترنت ،و لكن لأول مرة تحس بهذا القلق و الصدمة، كأنها تفعل شيئا ً خطأ ! خطأ!

ندى: لأ ، لا لا لا لأ، ما ينفعش، كده غلط، أنا مش حأكمل مش حأقدر، أيوه بس حأرد، أصدي لأ مش حأرد ! أنا حأقفل! يللا حأقفل، قاللي صاحبي مات قلتله البقاء لله، قالي شكرا، ً خلاص نخرج من الصوان! أقوله العفو و أخرج ، آه ، هو شكرا ً العفو باي خلاص !

( و تكتب " العفو " و ترسلها )

_________________________________________-______

(ينظر هاني إلى الشاشة إلى " العفو " و يفرح و يقلق و لا يعلم ماذا يفعل ،ماذا يكتب؟ لقد قال شكرا ً و هي ردت بالعفو، ليس هناك شيئا ً آخر يُقال أو يُكتب، فينظر إلى الشاشة في صمت و لا يفعل شيئا ً )

( تنظر ندى إلى الشاشة، ماذا ؟ لا رد ؟ و لا توجد أي علامة تفيد أنه يكتب على الناحية الأخرى ؟ إذاً هذه هي النهاية، نعم، سوف تغلق الشاشة، نعم، سوف تغلقها، و لكن سيكون هذا كأنها تغلقها في وجهه و هو لن يفهم لماذا تفعل ذلك، سوف يظن أنه أخطأ في شئ!

سوف تقول له " مع السلامة " كما كانت قد قررت و هذا كل شئ،، إنه وقت الخروج من هذا الموقف الغريب كله،،

و تكتب : " مع السلامة " و ترسلها و تنظر إلى الشاشة غير متأكده ماذا تنتظر أو ماذا تريد أن تنتظر...

(يقرأ هاني " مع السلامة " و يصدم)

هاني : لا لا لأ، أرجوكي ، لا ، ما تمشيش، ماتسبنيش أرجوكي!

و يكتب سريعا ً : " أرجوكي لا تذهبي أرجوكي " و يبعثها

(تنظر ندى إلى الرسالة و تصدم و تحدث الشاشة مرة أخرى)

ندى : يا خبر! طب و بعدين ؟ إنت أصلك مش فاهم ،أنا ما ينفعش ، ما أنت عارف، مش قولتلك؟

( ثم تنظر إلى الرسالة مرة أخرى )

ندى: بس يا حرام ده زي ما يكون بيصرخ طب أعملك إية بس ؟

( و تظل أمام الشاشة لا تعلم ماذا تفعل )

( ينظر هاني في صمت قاتل إلى الشاشة، كأن الزمن توقف و هو ينتظر ليرى ماذا ستفعل، أستتركه للأبد أم ستستجيب لصرخته؟ يظل صامتا ً و كأنه يوقف أنفاسه و نبضات قلبة منتظرا ً ردة فعلها ،، لا شئ ! لا شئ، لم ترد و لكنها لم تغلق الشاشة أيضا ً ،فلو كانت أغلقت لكان ظهر ذلك عنده ، نعم ، هي هناك ، هي معه، و لكنها مثله لا تعلم ماذا تقول له أو تفعل من أجله! نعم،،

( ندي تنظر إلى الشاشة لا تعلم ماذا تفعل! يجب أن تنهي هذا الوضع، يجب ألا يضعفا ، ليس من المفروض أن يلجأ لها هي بل يجب أ ن يلجأ لزوجته! و لا يجب أن يضغفها ضعفه هو!!لا يجب! سوف ترد عليه فقط بهذه الكلمات، فهي لن تتركه هكذا! تكتب له :

ندى: " زوجتك! هي التي يجب أن تشكو لها الان ليس أنا! مهما كان ما بينكما ، سوف تقف بجانبك!

هاني: كان هذا فالماضي، و لكن نحن الان ....... كل ما يمكن قوله هو أننا الان شئ اخر!

ندى: أعلم، و أشعر و لكن ، يجب أن نحاول! يجب أن .....

هاني: حتى في هذه اللحظة و أنا في أشد الحاجة إليها لا ترد! و عندما أرجع، لن ترد و لن نتكلم، فقد أخرجتنى من حياتها ، و أخشى أنها أخرجتني من ...قلبها! أين ذهبت كل المشاعر .. أين حياتنا؟ كأني أعيش وحيد ، وحيد!

ندى: :كأنك تتكلم عن حياتي أنا! فهاني –زوجي – لا مكان لنا معه، أو.... في قلبه! يظن البشر أزراراً تدار و تغلق حسبما تسمح الظروف،،، ظروفه هو!

هاني :كأننا نتكلم على شخصين طبق الأصل ،،،، تخيلي لو كانوا قد تقابلوا قبل أن...

( و يتوقف و لكنه يبعث بالرسالة، نعم فهي سوف تفهم ، ينتظر بلا حركة كأنه لا يعلم ماذا يتوقع ، و لكنه يريد أن .. ماذا يريد؟

(تنظر ندى إلى الجملة ، و تصدمها، تصدمها صدمة تفيقها ، و إذا بها تدرك الذي تفعله و الذي كانت ستفعله، تتحدث مع رجل غريب متزوج و تشاركه أفكارها و مشاعرها و تجارب حياتها ، و تصل بهما الدرجة إلى ... ما هذا الذي يحدث؟ ما هذا؟ لا !

ثم تكتب سريعا ً :" آسفة يجب أن أذهب! فكريم سيصل في أي وقت الآن ، أدعو لك بحياة سعيدة مع زوجتك، في رعاية الله."

( ترسل الرسالة و بدون أي إنتظار للرد تخرج من السايت فوراً، ولكنها تظل أمام الكمبيوتر في حالة ذهول بلا حراك، و بعد دقائق، تبدأ الدموع في النزول و الأعصاب في الإنهيار!

---------

(يظهر رد ندى على شاشة هاني و يقرأ ها وفجأة يجد رسالة تفيد بأن الطرف الآخر غادر المحادثة . يفقد أعصابه فجأة و لا يعلم ماذا يفعل ! ماذا يفعل؟

ينظر إلى الشاشة بإرتباك ، و يحاول قراءة حديثهما مرة أخرى حتى لا يشعر أنها رحلت و تركته!! فهو يحتاج وجودها أكثر من هذا الوقت البسيط، حتى و إن كان كل ما سيبقى له منها هي تلك الكلمات الأخيرة!..

و يقرأ، ثم يتوقف: " زوجي هاني"؟ كريم ؟ ( و فجأة ) أزرار تغلق! ده كلام .... ده كلام..........................ندى ؟!!!

( يأخذ موبايله و يطلب رقم هاتفها، لا ترد .

يجري من مكتبه و ينزل إلى سيارته و يقودها نحو البيت بجنون )

(تجلس ندى أمام شاشة الكمبيوتر و كأنها مصدومة حتى أنها لا تسمع الموبايل و هو يرن بجانبها،، كيف؟! كيف وصلت لهذه المرحله؟! هذه مرحلة خيانة ! نعم، خيانة ! خيانة المشاعر و الأفكار ،، فليس من اللازم التلاقي و اللقاء حتى تتم الخيانة، بل الخيانة ممكنة بداخلنا، في عقولنا و قلوبنا و تنسال الدموع من عينيها

ندى: ليه يا هاني؟ ليه عملت فيا كده، ليه؟ حرام عليك! أنا عمري ما كنت كده، و عمري ما حأبقى كده، ليه يا هاني ؟ حرام، حرام عليك!!

( و فجأة يدخل هاني من باب المنزل و ينادي)

هاني: ندى !!!

( يذهب و ينظر إليها حيث تجلس و هي تنظر إليه في حالة لا مبالاة و الدموع تنهمر من عينيها و ينظر إلى الكمبيوترالمفتوح أمامها ثم إليها، وهي تنظر إليه و كأنه قاتلها !

هاني: يا خاينة ، إنت إزاي...؟!

ندى: يا ريتني عملت كده من زمان ، كنت عرفت إن فيه راجل تاني في الدنيا دي عنده شوية مشاعر و أحاسيس، شوية دم بيجري في عروقه!

هاني: إنتي- إنتي بتقولي إيه؟؟؟!!

ندى: كل ده بسببك! حرام عليك يا أخي! أنا مش عايزاك خلاص، خلاص مش عايزاك!!

( و تقوم من مكانها لتتركه )

هاني: ( يضحك ) حتسبيني علشانه؟ للدرجة دي ممكن تخوني و تبيعي؟

ندى: أنا بأبيع علشان ما خونش! و يا ريتك كنت ربعه، ما كانش زماني بعت!

هاني: أنا مش ربعه بس، أنا الأربع ترباع يا هانم ! أنا إللي على الناحية التانية من فضفضيلي!!

( تصدم ندى و تنظر إليه و تصمت و تصمت،،،،،،، ثم،،،، تنفجر

ندى : بتخوني يا هاني !!!!!!

الدكتور: لكن إنت قلت أزرار تتفتتح و تتطفي ، و ... يا ترى كان إيه قصدها بالكلام ده؟

هاني:ما انت عارف الستات بأه يا دكتور!

الدكتور: لأ ، يا ريت توضح أكتر.

هاني: عايزينا نعيشلهم في المود إياه ده طول الوقت!

الدكتور: أيوه يا أستاذ هاني ، المود إياه ، ده اللي هو إيه بأه؟

هاني: ما فيش أي مراعاة !! على طول كده عايزين مننا ---

( يكتب الدكتور و هو يردد : عايزين--(ثم ينظر إلى هاني ) فلوس ؟

هاني : لا يا دكتور.

يفكر الدكتور : هدايا ؟

( يهز هاني رأسه بالنفي )

الدكتور: خروج ؟ فسح ؟ معلهش حضرتك يا ريت تفسر، علشان أقدر أكتب ملاحظاتي بدقة أكثر و نوصل لحل!

هاني: يا دكتور! يعني عايزينا نقعد نحب فيهم....عايزين يعيشوا في قصص حب! ما خلاص حبينا و اتجوزنا ! خلاص بقى! مافيش أدني إحساس بالنضوج أو المسئولية!! على طول عايزة المود ده لما طهئتني!

(ينظر إليه الدكتور هذه المرة بإنتباه كبير و هو لا يصدق ما يسمعه!)

الدكتور : حضرتك بتكلم على ... ال... الحُب؟

( و يركز الدكتور جدا ً جدا ً و يبلع ريقه و يسأل ببطء )

الدكنور : هي بتقولك أنا عايزة حُب ؟ بتقولها و إنت بتسمعها ؟

هاني: ساعات ،، و ساعات تانية ---

الدكتور : ساعات تانية -- أيوه أيوه سامعك يا أستاذ هاني--

هاني: ما أنت عارف يا دكتور، أكيد خمسين راجل إشتكالك قبل كده!

الدكتور : لأ، في الحقيقة دي أول قضية من نوعها يا أستاذ هاني!

هاني : عارف لما (و يسرح و يتذكر) بيلبسوا شيك أوي و يبقوا شكلهم حلو أوى و البرفان كمان ريحتها حلوة أوي!!

( و يسكت و يتذكر، و يحلم معه الدكتور)

( ثم يفيق)

هاني: إيه ؟ مش بني آدم لازم أرتاح و أنام علشان أصحى تاني يوم أتهبب أشتغل ؟

( ينظر الدكتور إلى هاني في حالة عدم تصديق و فمه مفتوح طوال كلا م هاني، ثم يردد كأنه لا يصدق أنه يكتب ما يكتبه )

الدكتور : يشتكي الزوج إنه بيرجع يلاقي مراته مش منعكشة و مش مبهدلة و ريحتها مش بصل و ثوم و ،،،و ،،،،

( ثم ينظر إلى هاني و يقول )

الدكتور : لأ ده كتير أوي يا أستاذ هاني!

هاني: و مش كده وبس ،،،

الدكتور : ممكن يبقى فيه حاجة تاني ؟ دانا رجليا سابت من إللي قولته . لسه فيه تاني، يا أستاذ هاني ؟

هاني: حرماني من المطاردة، من متعة إني أجري وراها ! يا ما كنت أسمع حكايات صاحبي - هو كان بايظ أه و مات غبي - بس كان نفسي مرة واحده أكون مكانه و مراتي تبقى بعيدة و صعبة و لو لدقايق! حرماني من ..

( و يبحث عن الكلمة المناسبة)

الدكتور : حرماك من البعد و الرفض ؟ عايزها ترفضك يا أستاذ هاني ؟

هاني: نفسي يا دكتور تقولي لأ مش عايزاك ، و مش عايزة أكون معاك... أكيد يا دكتور جربت متعة التحدي و الرفض أكيد!

(يسرح) الدكتور : كتير يا أستاذ هاني، كتير.

(يجيب هاني بحماس)

هاني: شوفت يا دكتور! .... و شوفت بعد كده، لما تشعرإنك جبت الصعب وخدته في حضنك، ليك بتاعك،

( ثم ينظر للدكتور )

هاني: بس إنت أكيد مش حتقدر تفهم حالتي ، خليك إنت في الحالة الجميلة التانية و إستمتع

الدكتور : في الحقيقة يا أستاذ هاني أنا لا حأفهم الحالة الأولى و لا التانية

هاني: إزاي يا دكتور حالة ما بعد اللأ

الدكتور : في الحقيقة يا أستاذ هاني أنا ما وصلتش إلا لمرحلة اللأ ،، باين مراتي سمعت بطريقة ما نصيحة حضرتك بس لغاية كلمة لأ - تَلَات سنين لأ!

هاني: تلت سنين ؟ كتير برده ، بس تخيل بأه بعد كل الوقت ده لما..

( يقاطعه الدكتور سريعاً)

الدكتور: ما ظنش حأعرف يا أستاذ هاني لإني بأطلقها اليومين دول ، و لسه جاي من عند المستشار العائلي بتاعنا قبل ما أجيلك علشان تستشرني!

( و يبدأ في لم حاجياته )

الدكتور: و بما إنك إستشرتني فأنا بأرجح إنك تطلقها .

هاني: مش قولتلك يا دكتور

( ثم يتراجع بعض الشئ ) مع إننا ، يعني بعد كل اللي انت عملته لا يمكن --

الدكتور : إنت لازم تطلقها النهارده قبل بكرة ، النهارده 30 مارس يبقى كمان ثلاث أشهر 30 يونيو،، ده إنت تطلقها حالا ً!

هاني: بس إيه يا دكتور إللي حمسك لرأيي مرة واحدة؟ أنت كنت الأول عايزني أرجعلها.

الدكتور : علشان 30 يونيو إن شاء الله حأعمل فرح و عازمك !!!

هاني: إنت حتتجوز تاني يا دكتور ؟

الدكتور : لأ دي حتبقى جوازتي الأولى يا أستاذ هاني و مش عايز غيرها بس قول يا رب

( يأخذ حاجياتة ليغادر الغرفة )

هاني: طب و اشوفك إمتى يا دكتور؟

الدكتور: لا يا أستاذ هاني ، لا يا ابني ، أنا كده خلصت معاك. إنت تأخذ بعضك و على المأذون عدل. أما هي فسيبهالي خالص و قول يا رب، سلام عليكم.

---------------------------------

(ينزل الدكتور على السلم مسرعا ً و يخرج الموبايل من حقيبته و يطلب رقم هاتف ندى)

الدكتور : أيوه يا مدام ندى ، لازم أقابل حضرتك حالا ً! لأ، أمر ما يستناش لبكرة ، معلومات جديدة عايز أعرف رأيك فيها ، أنا إللي حأعدي على حضرتك ، مسافة السكة .

(و يغلق الهاتف)

الدكتور: باي باي يا ندوتي، آخ يا بركة دعاكي يا مّا!! 41

ندى: هو قال كده؟ !!! يعني كان عارف و حاسس، و بيسيبني ؟

( بحزم ) الدكتور : أييوه! كان عارف و حاسس و بيسيبك تخبطي دماغك في الحيط أيوه!

ندى: ياما حرمني من إني أدلع عليه ،ليه يا هاني كده، ليه؟

الدكتور : ده جبار، ظالم ! إوعي يا ندى هانم، إوعي تفكري ترجعيله!

ندى: لا يمكن! أنا مش حأعمل غلطتي دي أبداً تاني، لا يمكن

(ثم تتذكر و تقول بعطف )

ا ! ندى: مع إنه كان ساعات حقيقي بيبقى تعبان و مهموم!

الدكتور: ولو يا مدام ندى، ده إفترى!

( يضرب الموبايل ، و في سرعة شديدة يحاول الدكتور إغلاقه، و لكنه يضغط على الرد بالخطأ، فيسمع هاني المحادثة على الطرف الآخر)

( يقود هاني سيارته )

هاني: آلو، دكتور

ندى: بس هو كان كتير بيرجع متأخر ، تعبان و مهموم ، حتى لما كان بينام، صوته كان بيبقى تعبان.

هاني: طب ما دام عارفة، تعبتيني معاكي ليه ؟

الدكتور : لا يا مدام ندى، أنا بقولك ده ظلمك ، و ما عرِفش قيمة النعمة اللي في إيده!

هاني: الراجل ده بيقول إيه؟؟ بيستهبل ؟ آلو

ندى: عندك حق، و علشان كده لا يمكن حأعمل الغلطة دي تاني!

الدكتور : لا يا مدام ندى، إوعي تقولي إنك مش حتجوزي بعده، مش كل الرجالة زي جوزك.

هاني: ينهارك إسود! آلو! إنت يا دكتور حمار! آلو!

ندى: طبعا ً حأتجوز! أنا مش حأقعد كده لوحدي!

هاني: نعم يا ست هانم ! آلو، آلو! طيب، أنا جايلكو !

الدكتور : أيوه و عندك شروط معينة في شريك حياتك المقبل؟

هاني: إيه ؟ الراجل ده اتجنن؟... 30 يونيو النهارده 30 مارس... يا نهارك طين !!

ندى: عايزاه على طول بيحبني و بيجري ورايا و يدلعني و .. لأ أنا مش عايزة أتكلم في الموضوع ده دلوقتي!

الدكتور : ليه بس؟ د أنا أعرف واحد بالضبط اللي بتتمنيه!

ندى: لأ، أنا كده مش مرتاحة، إحنا إيه؟ مش خلصنا خلاص؟

الدكتور : خلصنا إيه؟ داحنا لسه بنبتدي.

ندى: بس أنا خلاص، قلت اللي عندي ، و لو مايضايقكش، نبقى نكمل في وقت تاني .

الدكتور : أنا بس كنت عايز أقولك

( يأتي صوت هاني من وراءه )

هاني: بتقولك خلاص!

(يفزع الدكتور و ندى و ينظرون نحو هاني الواقف بالباب )

الدكتور : أستاذ هاني؟!

ندى: هاني !!!

( و تدخل سريعا ً إلى ااداخل لتحسن من شكلها )

هاني: يبقى تتفضل من غير مطرود و ما تجيش تاني !

( الدكتور يلم حاجياته و يسرع نحو الباب و هو مرعوب )

الدكتور : أنا كنت بس..

هاني: حط موبايلك على ودنك

الدكتور : إيه ؟

هاني: ( يزعق ) حط موبايلك على ودنك بأقولك

( يرتجف الدكتورمن نظرة هاني و صوته ) : حاضر

(يخرج موبايله من حقيبته و يضعه على أذنه )

يتكلم هاني في موبايله : مع السلامة يا دكتور !!!

يفهم الدكتور : هو الموبايل، كان مفتوح ؟؟

( يهز هاني رأسه بالأيجاب )

الدكتور : لأ ، كده يبقى مع السلامة.

( و يمر خلال الباب و هو يقول:" عوض عليَّا يا رب! دعاكي يامّا!" )

( يرزع هاني وراءه الباب بشدة!!

تخرج ندى إلى الصالة مرة أخرى لترى ماذا يجري، فتجد هاني ما زال موجوداً)

ندى: إنت إزاي تسمح لنفسك تدخل عليّا كده ؟

هاني: إنتي إللي إزاي تسمحي لواحد زي ده يدخل البيت عليكي لوحدك ؟

( و يقترب نحوها )

ندى: قال إنها حاجة مهمة أوي دلوقتي، بس برده ما تفوتش الموضوع ، إزاي تدخل عليّا كده ؟

هاني: إنتي ناسية إنه بيتي و لا إيه يا هانم؟

ندى: إنت إللي ناسي إن إحنا خلاص بنطَّلَّق ، يعني مش من حقك تدخل هنا تاني !

هاني: إنتي إزاي بتتكلمي بعد اللي عملتيه؟

ندى: اللي عملته أنا؟! على الأقل يا أستاذ، أنا لما حسيت إن فيه همسة غلط قفلت السايت، لكن الدور و الباقي على اللّي كان عايز يكمل في الغلط و يعرف واحدة على مراته ، لأ و إيه متجوزة و مخَلِفة!!!

هاني: ضِعِفت و إنتي السبب.

ندى: خلاص يبقى أنا كمان ضعفت و إنت السبب.

هاني: برده ما تغلطيش.

ندى: ليه ما غلطش؟ إذا كان قدوة البيت نفسه غلط ؟

( بصوت أهدى ) هاني : علشان إنتي أحسن مني، إنتي اللي كنتي لازم تمنعيني من الغلط.

ندى: أنا مش مامتك ، أنا مراتك! مراتك، و لي حقوق، من حقي تبقى ليا و معايا لما احتاجك!! و إبنك ..

هاني: عارف إنك مراتي(و يقترب أكثر) و إني لازم أبقى معاكي، و مع كريم ،،،،و إنكو وحشتوني ، وحشتوني أوى................. ( و يقترب منها )

ندى: بعد إيه ؟ النبتة ماتت خلاص! مش ده كلامك؟

( يقترب أكثر منها )

ندى: إبعد عني يا هاني، أنا خلاص مش عايزاك !

(ينظر لها هاني و تدمع عيناه من الفرح)

ينظر ندى : أنا آسفة! ماتزعلش.

هاني: ( صوته يمتلئ سعادة ) أزعل إيه!!؟؟ خدي راحتك !!

------------------------------------------------------------

النهاية؟؟

( يجلسان سوياً في لحظة صفاء و هناء، يستمعان لأغنية حسين الجسمي :